'Yan Ta'adda Sun Kai Farmaki Kauyen Sokoto Sun Kashe Mutum 4 Tare Da Sace 18

Rundunar ‘yan sandan  jihar Sokoto ta tabbatar da cewar yan bindiga sun kai hari kauyen Giyawa da ke karamar hukumar Goronyo a jihar, inda suks shaida an kashe mutane hudu. Jami’in hulda da jama’a na rundunar ‘yan sandan jihar, Ahmed Rufa’i ya tabbatar cewa, maharan sun yi awon gaba da mutane 18, wadanda kuma suka yi awon gaba da wasu kayayyaki masu daraja da suka hada da dabbobi a jihar. Sanarwar ta ci gaba da cewa bakwai daga cikin wadanda aka yi garkuwa da su a baya sun tsere daga hannun wadanda suka yi garkuwa da su. Yayinda suka koma unguwarsu sa'anan mutane da dama daga cikin mazauna yankin suka gudu domin tsira wa rayukansu. Ko da yake wasu majia daga cikin al’ummar da abin ya shafa sun yi karin bayani bisa yadda akayi garkuwa da mutane sama da 30, amma jami'an tsaro sun ce mutane 11 ne kawai ke tare da maharan. Ya ce ‘yan sanda suna kan bin maharan kuma suna kokarin ganin an dawo da zaman lafiya a cikin al’ummar da abin ya shafa. Kana kuma suma mutane mazauna garin suna iya bakin kokarinsu domin ganin an samo yadda za a cimma zaman lafiya da kuma kawo karshe ga wannan tashin hankali marasa adadi a fadin jihar.